Isumaginninnermi siunnersortissanik ilinniartitsineq pillugu Namminersornerullutik Oqartussat nalunaarutaat nr. 26, 7. december 2000-imeersoq

 

Isumaginninnermi siunnersortissanik ilinniartitsineq pillugu Inatsisartut peqqussutaanni nr. 10-mi 31. oktober 1996-imeersumi § 5, imm. 2, § 17, imm. 2 kiisalu ISI oqaaseqaateqartereerlugu, § 18, imm. 1, §§ 20, 21 aamma 25 tunngavigalugit makku aalajangersarneqarput:

 

Kapitali 1
Ilinniartitaanerup aqunneqarnera

§ 1. Isumaginninnermi Siunnersortinngorniat Ilinniarfianni (ISI) ilinniartitaanermut siunnersuisoqatigiit arfineq-marlunnik ilaasortaqartoq pilersinneqassaaq:
1) ilaasortaq ataaseq Ilinniartitaanermut Pisortaqarfimmit toqqarneqartoq,
2) ilaasortaq ataaseq Isumaginninnermut Suliffeqarnermullu Pisortaqarfimmit toqqarneqartoq,
3) ilaasortaq ataaseq Kalaallit Nunaanni Kommuneqarfiit Kattuffiannit (KANUKOKA-mit) toqqarneqartoq,
4) ilaasortaq ataaseq Atorfillit Kattuffiannit toqqarneqartoq,
5) ilinniartitaanermut rektori
6) ilaasortaq ataaseq ilinniartitaanermi ilinniartitsisunit taakkulu akornannit toqqarneqartoq, aamma
7) ilaasortaq ataaseq ilinniartitaanermi ilinniartunit taakkulu akornannit toqqarneqartoq.
Imm. 2. Siunnersuisoqatigiinni ilaasortanut tamanut sinniisussat toqqarneqassapput.
Imm. 3. Ilinniartitaanermi siunnersuisoqatigiit suliassaqarfinni immikkut ittuni ilisimasalinnik aalajangiinerni taaseqataasinnaanngitsunik ataatsimiinnerni peqataatitsisinnaapput.
Imm. 4. Rektori ilinniartitaanermi siunnersuisoqatigiit siulittaasoraat. Ilinniartitaanermi siunnersuisoqatigiit namminneq inissitsitissapput siulittaasup tullia qinerlugu, suleriaasissaminnut siunnersuut namminneq suliaralugu, taannalu Ilinniartitaanermut Pisortaqarfimmut akuerisassanngorlugu nassiunneqassaaq.
Imm. 5. ISI Ilinniartitaanermut Siunnersuisoqatigiinnut allattoqarfiuvoq.

§ 2. Ilinniartitaanermi Siunnersuisoqatigiit isumaginninnermi siunnersortinngorniat ilinniartitaaneranni siunnersuisuupput, taamalu Ilinniartitaanermut Pisortaqarfimmut siunnersuuteqarsinnaallutik.

 

Kapitali 2
Ilinniartitaanerup imaa

Ilinniartitaanerup aaqqissuussaanera

§ 3. Ilinniartitaaneq ukiunik pingasunik affarmillu sivisussusiligaavoq, immikkoortunullu arfineq-marlunnut ataqatigiiaartunut agguagaalluni.
Imm. 2. Ilinniarnermut ilaavoq sulinermik sungiusarneq ilinniarnermi immikkoortup ataatsip sivisoqataanik sivisussusilik.
Imm. 3. Ilinniarnermut ilaavoq sulianut assigiinngitsunut tunngassutilik suliniummik ikinnerpaamik ataatsimik suliaqarnissaq ilinniarnerup immikkoortuata ataatsip missaanik sivisussusilik.

§ 4. Ilinniartut piffissaq ilinniarnerup sulinermik sungiusarnertaa atugassarititaasut makku tunngavigalugit ingerlatissavaat:
1) Sulinermik sungiusarneq ingerlanneqassaaq ISI-p sungiusarfissatut akuerisaani.
2) ISI sulinermillu sungiusarfissaq sungiusarnissaq pillugu isumaqatigiissusiussapput.
3) Ilinniartoq sulinermik sungiusarfimmi suliassanik suliaqarnermi suleqataanissamut pisussaavoq, sulinermullu sungiusarneq pillugu isumaqatigiissut naapertorlugu nipangiussisussaalluni allatigullu pisussaaffeqassalluni.
4) Ilinniartup sulinermik sungiusarnerup ingerlanerani allattariarsorluni pisassat marluk suliarissavai, taakku sulinermik sungiusarnerup akuerineqarnissaanut naliliinermi atorneqassapput, tak. § 29.
5) Ilinniartup sulinermik sungiusarfimmi akisussaasumik ilitsersuisoqarnissaa (sulilluni sungiusarnermi ilinniartitsisoq) ISI-p qularnaassavaa.

Ilinniartitsissutissat aaqqissuunneri

§ 5. Ilinniartitaanermi ilinniagassat ilinniartitsissutigineri nal. akunnerinik ilinniartitsiffiusunik 2300-nik sivisussuseqarput, imatullu najoqqutassiaanerusumik procentinngorlugu agguataagaallutik:

1) Isumaginninnermik suliaqarneri periaatsit aalajangersimasut atuagarsornertaallu	28 %
2) Tarnip pissusilerineq	14 %
3)  Inooqatigiilerineq	11 %
4) Aningaasaqarneq	14 %
a) akileraartarnermi inatsit inuiaqatigiillu allaaserineqarnerat       b) suliffeqarneq pillugu ilisimasassat kiisalu       c) isumaginninnermi aningaasanik pilersaarusiortarneq.
5) Isumaginninneq pillugu inatsiseqarneq	11 %
6)  Pisortat ingerlatsinerat pillugu ilisimasassat	5 %
7)  Inuit ataasiakkaat, ilaqutariillu pisinnaatitaaffii kingornussisarnermilu inatsit	6 %
8)  Pinerluttulerineq pinerluttulerinermilu inatsit	3 %
9)  Kulturi kinaassuserlu	3 %
10) Tarnip nappaataanik katsorsaaneq inooqatigiinermilu atukkat inuup peqqissusianut sunniuteqarnerat	5 %

Ilinniartitaanerup ilusilersugaanera

§ 6. ISI-p ilinniartitaanermi ilinniarnerup aaqqissuunnissaa suliarissavaa, taassumalu minnerpaamik imarissavai
1) ilinniagassat ataasiakkaat, pikkorissarnerit, sulinermik sungiusarnerit sivisussusissaat, suliniutinik suliaqarnermi piffissaliussat, allattariarsorlunilu aamma suliniummik suliat tunniunneqartussat imarisaat aamma pisassat pillugit najoqqutassat, taakkulu ilinniarnerup ingerlanerani inissisimaneri,
2) allattariarsorluni suliat tunniunneqartussat pillugit malittarisassat, tassunga atatillugu tunniussineq ataasiakkaarluni imaluunniit eqimattakkaarluni pisinnaassanersoq pisassanersorluunniit,
3) ilinniarnerup ingerlanerani misilitsissutissat taakkulu ilinniarnerup ingerlanerani inissisimanerinik allaaserinninneq,
4) misilitsitseriaatsit atorneqartut allaaserineri, tassunga ilanngullugit eqimattat ataatsimut misilitsinnerini peqataasussat amerlassusissaat,
5) misilitsinnerit suut karakteriliiviussanersut takussutissiorneri, aammalu misilitsinnerni suni naliliinerit "akuerineqarpoq"/"akuerineqanngilaq" atorneqassanersut,
6) "akuerineqarpoq"/"akuerineqanngilaq" naliliinermi atorneqaraangata suut pingaarutillit ilaatinneqassanersut erseqqissaatigalugit, tassunga ilanngullugit naliliinerit taakku atornissaannut pinngitsoorani naammassisassat,
7) misilitsinnissat pillugit malittarisassat,
8) ilinniartussatut nalunaarsimasut amerlassusii malillugit ilinniaqatigiit avinneqartarnissaat ataatsimulluunniit katinneqartarnissaat pillugit malittarisassat,
9) ilinniartitaanermi pilersaarutit,
10) ilinniarnerup ingerlanissaanut maleruagassat aamma
11) ilinniartut soraarsinneqartarnerat pillugu najoqqutassatut malittarisassat.
Imm 2. Ilinniartitaanerup aaqqissuunnera Ilinniartitaanermut Pisortaqarfimmut ilisimatitsissutitut nassiunneqassapput.

Ilinniartitaanermi malinnaaneq

§ 7. Ilinniartup ilinniartitaanermi aaqqissuussineq malillugu malinnaanissamut piumasaqaatitut aalajangersakkat malissavai.
Imm. 2. Ilinniarnermi malinnaanermik naammattumik ingerlatsisoqanngippat ISI-p ilinniartoq ilinniarnermi peqataaginnarnissaanit tunuartissinnaavaa.
Imm. 3. Ilinniartup qinnuteqarneratigut ilinniarfimmi pisortap ilinniartoq semesterimik uteqqiinissaanik akuersissuteqarsinnaavoq.

 

Kapitali 3
Sammisani ataasiakkaani ilinniakkat,
sulinermik sungiusarnerni suliniusiornernilu siunertat

Ilinniagassatut sammisassat

§ 8. Isumaginninnikkut suliassanik suliaqarnermi aalajangersimasumik periaaseqarnermik ilisimasassartaanillu ilinniagassatut sammisani siunertaavoq, ilinniartut isumaginninnermi suliassani aalajangersimasumik periaaseqarnermik ilisimasaqalernissaat paasinninnissaallu, taamaalillutik ataatsimut isiginninneq aallaavigalugu
1) inooqatigiinermi atukkat ajornartorsiutinngorsimasut pissutaat, taakkulu inunni ataasiakkaani, ataatsimoortuni inuiaqatigiinnilu malunnaataat kingunerisaallu misissoqqissaarsinnaalissallugit, aamma
2) isumaginninnermi sulinermi aalajangersimasumik periaaseq pinaveersaartitsinermi ajornartorsiutinillu aaqqiiniarnermi piginnaassuseqarlualernissaq.

§ 9. Tarnip pissusilerinermik ilinniagassatut sammisani siunertaavoq
1) ilinniartut inuup ataatsip inuillu ataatsimoortut ineriartornissamut periarfissaat, kulturimut inuiaqatigiinnullu tunngasunut naleqqiullugit killilersuutit pissutsillu imminnut sunniivigeqatigiittarnerat pillugit ilisimasaqalernissaat aamma
2) ilinniartut tarnip pissusilerinermik isiginneriaaseqarnerat periaatsinillu aalajangersimasunik isumaginninnermi suliassani aalajangersimasuni atuisinnaalernissaat.

§ 10. Inooqatigiilerinermi ilinniagassatut sammisani siunertaavoq
1) ilinniartut inuttut atukkat ajornartorsiutinngorsimasut pissusiinik, atugassarititaasunik pissutaasunillu inunnut ataasiakkaanut, ataatsimoortunut inuiaqatigiinnullu tunngatillugu ataqatigiinnerinik paasinnillutillu ilisimasaqalernissaat aamma
2) ilinniakkami inooqatigiilerinermi periaatsinik isumaginninnermi suliassanik suliaqarnermi atuisinnaalernissaat.

§ 11. Aningaasaqarneq pillugu ilinniagassatut sammisani, tassunga ilaatillugit akileraartarnermi inatsisinut inuiaqatigiillu pissusiinik allaaserinninnermut tunngatillugu siunertaavoq ilinniartut
1) inuiaqatigiit kalaallit inuuniarnermi atugarisatigut aningaasarsiornikkullu ineriartornerannik aaqqissuussaanerannillu ilisimasaqalerlutillu paasisaqarnissaat,
2) innuttaasut inuuniarnerminni atugarisaat, tassunga ilanngullugit isertitaqartarnermut akileraartarnermullu tunngasut kiisalu suliffeqarnermut ineqarnermullu tunngasut,
3) pisortat akuleruttarnerisa aaqqissuussisarnerisalu sunniutaat aammalu inuit ataatsimoortut inuuniarnerminni atugarisaat inuuniarnikkullu ajornartorsiutaat aamma
4) pisortat ingerlatsiviini nuna tamaat isigalugu kommunikkaartumillu pilersaarusiorneq tulleriiaarisarnerlu tassani isumaginninnerup iluani suliassaqarfiit pingaartillugit.

§ 12. Isumaginninnermut tunngasunik inatsisit pillugit ilinniagassatut sammisani siunertaavoq, ilinniartut
1) isumaginninnikkut inatsisinik aammalu isumaginninnermut tunngasunik ingerlatsinermi tunngaviusunik paasinnillutillu ilisimasaqalernissaat aamma inatsisit nalinginnaasumik paasineqarnissaannut nassuiaatinik ilisimannillualernissaat aamma
2) isumaginninnermi suliassani ajornartorsiutit aalajangersimasut nalinginnaasullu aaqqiiviginissaanni inatsisitigut malitassanik atuilluarsinnaalernissaat.

§ 13. Pisortat ingerlatsinerat pillugu ilisimasassanik ilinniagassatut sammisani siunertaavoq, ilinniartut pisortat aalajangiisarnerini malitassatut tunngaviusunik ilisimasaqalernissaat, tassunga ilaatillugit inatsisitigut najoqqutassat, pisortat sulianik ingerlatsisarnerat pillugu aalajangersakkat aammalu aqutsilluni ingerlatsinermik nakkutilliineq pillugu malittarisassat.

§ 14. Inuit ataasiakkaat, ilaqutariillu aammalu kingornussisarneq pillugit inatsiseqarnermik ilinniagassatut sammisassani siunertaavoq, ilinniartut inuit ataasiakkaat, ilaqutariit kingornussisarnerlu pillugit inatsiseqarnerup iluani inatsisitigut aalajangersakkat inuit ataasiakkaat pisinnaatitaaffeqarnerannik pisussaaffeqarnerannillu aaqqiinernut tunngaviusunik paasisaqarlutillu ilisimasaqalernissaat, taakkununnga ilanngullugit aningaasanik pigisanillu pisuussutit pillugit inatsiseqarnerup iluani tunngaviusumik aalajangersakkanik ilisimasaqalernissaat.

§ 15. Pinerluttulerinermut tunngasunik ilisimatusaatit aamma pinerluttulerinermik inatsisit pillugit ilinniagassatut sammisani siunertaavoq, ilinniartup
1) pinerluttarnerit amerliartorneri siaruariartornerilu isumaginninnikkullu nakkutilliinerup ilusilersugaanera, annertussusia allanngoriartorneralu paasisaqarfigalugillu ilisimasaqarfigilissagai aamma
2) inatsisitigut aalajangersakkat innuttaasut pinerluttulerinermik inatsisit eqqartuussisoqarnermi inatsiseqarnerup iluani pisinnaatitaaffiinik pisussaaffiinillu aaqqiissutaasartut paasisaqarfigalugillu ilisimaqarfigilissagai.

§ 16. Kultureqarneq kinaassuserlu pillugit ilinniagassatut sammisani siunertaavoq, ilinniartut oqaluttuarisaanermut, kultureqarnermut sumilu inunngorsimanermut tunngasut tamakkulu inooqatigiinnermi qanoq sunniuteqartartut paasisaqarfigalugillu ilisimasaqarfigilissagaat.

§ 17. Tarnip nappaataanik katsorsaaneq pillugu ilinniagassatut sammisani siunertaavoq, ilinniartut tarnikkut nappaatinik, tarnikkut nappaatit katsorsarneqartarnerannik inuuniarnermilu atukkat inuup tarnikkut nappaateqalissutigisartagaanik katsorsaariaatsit ilisimasaqarfigilissagaat, taamaalillutik isumaginninnermi siunnersortit tarnikkut nappaatilinnik isumaginninnikkut sullissinermi ikiorsiinermilu inissisimanerat paasisimasaqarfigilissagaat.

Sulinermik sungiusarneq

§ 18. Sulinermik sungiusarnerup siunertaraa, ilinniartut
1) isumaginninnikkut suliassanik isumaginninnermilu suliffeqarfinnik ilisimasaqarlualernissaat,
2) atuagarsornikkut ilisimalikkanik isumaginninnikkut suliani tassanissaaq sullitanik attaveqarnermi atuisinnaalernissaat,
3) inuuniarnikkut ajornartorsiutit pillugit ikiorsiiniarnermi aaqqiiniarnermilu isumaginninnikkut sullissinermi periarfissanut killissanullu tunngatillugu naliliisarneq misilittagaqalernissarlu,
4) inuuniarnermi ajornartorsiutinik suliaqarnermut atatillugu ilisimalikkanik periaatsinillu aalajangersimasunik toqqaallunilu atuisinnaanermik sungiusarneqassallutik, tassunga ilaatillugu isumaginninnikkut suliassanik suliaqarnermi nammineq pisinnaasatigut iluaqutissat pillugit naliliisarnissaq,
5) sulinermik sungiusarfiup siunertaanik, qanoq aaqqissuussaaneranik sulisullu akuleriiaarnerannik paasinnilluarnissaq, aamma
6) isumaginninnikkut suliassanik suliaqarnermut atatillugu ileqqorissaarnissamik ilisimasaqarlualernissaq.

Suliniummik allaaserinninneq suliat pillugit assigiinngitsunik ilinniagallit
suleqatigalugit suliaqarneq

§ 19. Ilinniagassatut sammisani suliniummik allaaserinninnermi suliat pillugit assigiinngitsunik ilinniagallit suleqatigalugit suliaqarnermi siunertaavoq, ilinniartut
1) nammineerluni sulisinnaanermut sungiussinissaat,
2) suleriaaseq ajornartorsiutinik suliaqarnermut atortoq tunngavigalugu inooqatigiinnermi inuuniarnikkut ajornartorsiutit aallaaviinik tamakkulu ersittumik pissusiinik assigiinngitsunik suliallit ataatsimut isiginnittaasiat atorlugu paasinnittaaseqalernissaat, aamma
3) paasiniaaqqissaarneq tunngavigalugu pinaveersaartitsinermut sammisuni ikiorsiissuteqarnissamullu sammisuni aaqqiissutissanik siunnersuuteqarsinnaanngornissaat.

 

Kapitali 4
Ilinniartitaanermi misilitsinnerit

Ilinniartitaanermi misilitsinnerit siunertaat

§ 20. Ilinniartitaanermi misilitsinnerni ilinniartup pisinnaasai ilinniartitaanerup siunertaanut piumasaanullu naapertuunnersut aammalu qanoq nallersuussinnaatiginersut naliliiviginissaat siunertaavoq.

Misilitsinnerit ilinniarfimmi ilinniartitsisunit aamma
ilinniarfiup avataaneersunik naliliiviusartut nassuiarneri

§ 21. Misilitsinnerit ilinniarfimmi ilinniartitsisunit imaluunniit ilinniarfiup avataaneersunik naliliivigineqartarput.
Imm. 2. Ilinniarfimmi ilinniartitsisunit misilitsinnerit tassaapput misilitsinnerit ISI-mi ilinniartitsisunit ikinnerpaamik marlunnit naliliivigineqartut.
Imm. 3. Ilinniarfimmi misilitsinnerit ilinniarfiup avataaneersunik naliliiviusut tassaapput misilitsinnerit ISI-mi ilinniartitsisumit ilinniartitsunilluunniit aamma Ilinniartitaanermut Pisortaqarfimmit nalileeqataasussatut toqqakkamit arlalinnilluunniit naliliivigineqartut.

Allattariarsorluni misilitsinnerit

§ 22. Allattariarsorluni ilinniarfimmi misilitsinnerit ilinniarfiup avataaneersunik naliliiviusunut ataatsimiititaliamit soraarummeerusiortussamik suliarineqassapput, tak. § 23.
Imm. 2. Ilinniarnerup naammassinerani ilinniartut misilitsinnerni suliarisimasatik tigunissaanik piumasaqarsinnaapput.

§ 23. Ilinniartitsissutini allattarissanik misilitsiffiusussanut ilinniarfimmi pisortaq ataatsimiititalianik soraarummeerusiortussanik pilersitsissaaq. Ataatsimiititaliani soraarummeerusiortussani ilaasortaapput ilinniagassani ilinniartitsisut ilinniagassamillu ilisimasallit ikinnerpaamik marluk taakkulu sinniisussaat Ilinniartitaanermut Pisortaqarfimmit toqqarneqartut.
Imm. 2. Ataatsimiititaliani soraarummeerusiortussani ilaasortat ilinniagassamik ilisimasallit taakkulu sinniisussaat ukiut pingasukkaarlugit toqqarneqartassapput.
Imm. 3. Ilinniartitaanermut Pisortaqarfik ataatimiititaliat soraarummeerusiortussat suliassaat pillugit ersarinnerusunik aalajangersagaliorsinnaavoq.

Oqaluttarissanik misilitsinnerit

§ 24. Soraarummeersitsisuussapput ilinniartitsisut ilinniagassami ilinniartitsisuusimasut, taamaalilluni ilinniartitsisoq soraarummeersitsisuulluni. Soraarummeersitsineq sapinngisamik soraarummeersitsisup soraarummeertullu oqaloqatigiinnerattut ingerlanneqassaaq, tassani soraarummeernermi naliliisartoq peqataasinnaalluni. Ilinniartup ilinniakkamut atatillugu suliaqarsimaneranut takussutissat uppernarsaatitut soraarummeernermi ilaatinneqarsinnaapput.
Imm. 2. Soraarummeernermi apeqqutit soraarummeertunut makitsinikkut tunniunneqassapput. Soraarummeertup allattarissanik suliaa soraarummeerutaassappat, taanna soraarummeersitsinermi tunngaviussaaq.
Imm. 3. Soraarummeernermi naliliisartoq soraarummeersitsisorlu kisimik karakteeriliissapput.
Imm. 4. Soraarummeertoq soraarummeernissamut piareersarfeqartitaassappat, piareersarnerani nakkutilliisoqassaaq.
Imm. 5. Oqaluttarissanik soraarummeernerit kikkunnilluunniit najuuffigineqarsinnaapput.

Misilitsinnerit naliliinerillu

§ 25. Ilinniagassat kinguliini pineqartut allattariarsorluni misilitsinnermik ilinniarfiup avataaneersunit naliliisoqarluni naggaserneqassapput
1) inuit ataasiakkaat, ilaqutariit aamma kingornussisarneq pillugit inatsisit,
2) pisortat ingerlatsinerat pillugu ilisimasassat aamma
3) isumaginninneq pillugu inatsisit.
Imm. 2. Ilinniagassaq isumaginninnikkut suliassanik suliaqarnermi ilisimasassanut periaatsinullu aalajangersiamasunut tunngasoq allattariarsorluni aamma oqaluttariarsorlunilu ilinniarfiup avataaneersunik naliliisoqarluni misilitsinnernik naggaserneqassapput. Misilitsinnerit naligiimmik pingaartinneqarlutik oqimaalutarneqassapput.
Imm. 3. Ilinniagassat kinguliini taagorneqartut allattariarsorluni imaluunniit oqaluttariarsorluniluni ilinniarfiup avataaneersunik naliliisoqarluni misilitsinnernik naggaserneqassapput
1) tarnip pissusilerineq
2) inooqatigiilerineq
3) aningaasaqarneq.
Imm. 4. Allattariarsorluni naggataarutaasumik assigiinngitsunik ilinniagallit suleqatigalugit suliniut oqaluttariarsorluni avataaneersunik naliliisoqarluni misilitsinnermik naliliiffigineqassaaq, tassani ilinniartup ilaatigut nassuiassallugit allaatigisassamik toqqaaneq suleriaaseqarnerlu.
Imm. 5. Immikkoortuni 2-miit 4-mut misilitsinnerit taaneqartut, oqaluttariarsorneruppata, ilinniartut ataasiakkaat misilitsinnerattut imaluunniit ataatsimoorluni misilitsinnertut aaqqissuunneqarsinnaapput, taamatut pinermi matumanissaaq ilinniartut ataasiakkaarlugit naliliivigineqartartussaammata.

§ 26. Ilinniartitaanerup immikkoortuisa aappaanni ilinniartut ataasiakkaarlugit isumaginninnikkut suliassani ilisimasassanut periaatsinullu tunngasunut aammalu isumaginninneq pillugu inatsisinut tunngasunut ISI-mi ilinniartitsisut naliliisoralugit misilitsissapput. Misilitsinneq allattariarsorluni misilitsinneruvoq.
Imm. 3. Ilinniartitaanerup immikkoortuisa pingajuannut ingerlaqqissagaanni misilitsinnermi angusisimasariaqarpoq.

§ 27. Ilinniagassatut sammisani misilitsiffiusussani 13 atorlugu karakteeriliisarneq (13-skala) atorneqassaaq.

§ 28. Piffissap sulinermik sungiusarfiusup naanerani ISI ilinniartup sungiusarnermini pissarsiaqarsimanera naliliinerit "akuerineqarpoq" aamma "akuerineqanngilaq" atorlugit naliliissaaq.
Imm. 2. Ilinniartup allaaserisai sungiusarfiullu oqaaseqaataa tunngavigalugit naliliisoqassaaq.

Misilitseqqinneq

§ 29. Ilinniartoq ilinniagassatut sammisani tamani misilitseqqinnissamut nalunaarsinnaavoq, ilinniagassatut sammisani tamani karakteeri 6 ataassimaguniuk.
Imm. 2. Ilinniartoq ilinniagassamut ataatsimut taamaallaat marloriarluni misilitseqqinnissamut nalunaarsinnaavoq.
Imm. 3. Ilinniartoq misilitseqqinnissamut nalunaaruni ilinniagassamut sammisami tullianik misilitsinnissamut siullermut peqataasinnaatitaavoq.
Imm. 4. Ilinniartoq ilinniagassatut sammisami ataatsimi ataasiaannarani misilitsissimaguni karakteeri qaffasinneq atussaaq.
Imm. 5. Ilinniartitaanermut Pisortaqarfik pissutsini immikkut ittuni imm. 2-imiit 3-mut aalajangersakkanit immikkut akuersissuteqarsinnaavoq.

§ 30. Nappaammik uppernarsaasikkamik imaluunniit allamik peqquteqavillutik misilitsinnerni ilinniartunik peqataasinnaanngitsunik misilitsittoqarsinnaavoq. Misilitsinneq ingerlanneqassaaq kingusinnerpaamik misilitsinnermut tullermut atatillugu, aammattaaq takukkit § 6, imm. 1, nr. 7 malillugu malittarisassani aalajangersakkat.

§ 31. Ilinniartoq misilitsinnissamut takkutinngitsoorpat aammalu misilitsinnermut peqataaniarani nalunaaruteqarsimanngippat 00-mik karakteeriliisoqassaaq.

Misilitsittoqarnerani pissusissarititaasumit allaasumik iliornerit

§ 32. Ilinniartitaanermi misilitsinnerit tamanna pillugu malittarisassat malillugit ingerlanneqarnissaat ilinniarfimmi pisortap akisussaaffigaa.
Imm. 2. Misilitsinnerit ingerlanneqarneranni pissusissarititaasumit allaasumik iliornerit erniinnaq Ilinniartitaanermut Pisortaqarfimmut nalunaarutigineqassapput.

§ 33. Ilinniarfimmi pisortap soraarummeertoq misilitsinnermit peersisinnaavaa,
1) soraarummeertoq taamaaliortussaanani allanit ikiorteqarsimappat, akuerisaanngitsunik iluaquteqarsimappat imaluunniit allap suliaanik nammineq suliarinerarlugu saqqummiussisimappat, imaluunniit
2) soraarummeertup misilitsinnerup nalaani taamaaliortussaanani allanik ikiuisimappat ikiuiniarsimappalluunniit.
Imm. 2. Soraarummeertoq misilitsinnermit peersitaasimappat ilinniarfimmi pisortap pineqartup ilinniartitaanermit peersinneqarnissaa pillugu aalajangiisinnaavoq.

 

Kapitali 5
Angusinissamut piumasarineqartut

§ 34. Soraarummeernermi angusinissamut piumasarineqarput
1) karakteerit tamaasa katillugit agguaqatigiissitsinermi karakteeri minnerpaamik 6-iussasoq
2) ilinniagassatut sammisami isumaginninnikkut suliani ilisimasassat periaatsillu aalajangersimasut soraarummeerutiginerini minnerpaamik karakteeri 6 anguneqarsimassasoq,
3) amerlanerpaamik karakteerip ataatsip 6 ataassimassagaa, aammalu
4) sulinermik sungiusarneq ilinniagassallu allat soraarummeerutaanngitsut akuerineqarsimassasut.

 

Kapitali 6
Allattaaviit soraarummeernermullu uppernarsaat

§ 35. Ilinniarfimmi pisortaq allattaavinnik ingerlatsisuuvoq, ilinniartullu tamarmik immikkut qupperneqarput. Allattaavinni paasissutissat ilinniartumut namminermut tunngasut, uppernarsaatit, peqataannginnissamut akuerineqarnerit allallu nalunaarut malillugu immikkut akuersissutit, sulinermik sungiusarnerup naliliiviginera misilitsinnernilu karakteerit allaqqassapput.

§ 36. Ilinniartut, soraarummeernermi angusisimasut § 34 malillugu allagartartaartinneqassapput. Allagartaq tamanut atuuttumik aamma piginnittuinnarmut tunngasunik oqaasertalerneqassaaq.
Imm. 2. Piginnittumut tunngasunik oqaasertaliussani paasissutissiissutigineqassaaq
1) ilinniartumut namminermut tunngasut aamma ulloq ukiorlu ilinniarnerup naammassiffia,
2) sulinermik sungiusarnermi naliliineq "akuerineqarpoq" kiisalu sulinermik sunngiusarfiup suunera, aamma
3) misilitsinnerni ataasiakkaani karakteeriliussat.
Imm. 3. Oqaasertaliussani tamanut atuuttuni ilanngunneqassapput nalunaarummi § 3, imm. 1, § 5 aamma § 34.
Imm. 4. Soraarummeernermut uppernarsaat rektorimit ilinniartup allattaavinni quppernera malillugu suliarineqassaaq. Uppernarsaat ilinniarfimmi pisortamit atsiorneqassaaq.
Imm. 5. Ilinniartut ilinniartitaanermik naammassinninnatik qimatsisut qinnuteqarnikkut misilitsinnernut peqataaffigisimasanut, sulinermik sungiusarnerup akuerineqarneranut uppernarsaammik tunineqarsinnaapput kiisalu ilinniagassani paasinninneq tunngavigalugu karakteeriliiffiusuni karakteerimik tunineqarsinnaapput.

 

Kapitali 7
Atortuulersitsineq atorunnaarsitsinerlu pillugit aalajangersakkat

§ 37. Nalunaarut 7. decembari 2000 aallarnerfigalugu atortuulissaaq. Peqatigitillugu Isumaginninnermi siunnersortissanik ilinniartitsineq pillugu Namminersornerullutik Oqartussat nalunaarutaat nr. 13, 15. april 1991-imeersoq, Isumaginninnermi siunnersortissanik ilinniartitsinermi fagit pillugit Namminersornerullutik Oqartussat nalunaarutaat nr. 15, 15. april 1991-imeersoq kiisalu Isumaginninnermi siunnersortinngorniat ilinniartitaanerat pillugu Namminersornerullutik Oqartussat nalunaarutaat nr. 17, 20. august 1997-imeersoq atorunnaassaaq.

Namminersornerullutik Oqartussat, ulloq 7. december 2000

Lise Lennert

/

Karl Kristian Olsen